Kapriol' en Novjara Renkontiĝo/Novjara Internacia Semajno en Bitburg.

La nederlanda muzikgrupo Kapriol' venos koncerti dum la 10-a Novjara Renkontiĝo/3-a Novjara Internacia Semajno en Bitburg, Germanio, ĉi-jarfine. La kvarpersona grupo prezentos popolan muzikon, ankaŭ malnovstilan, kaj ludos por dancigi la partoprenantojn. Marita kaj Marian dum multaj jaroj partoprenis en la muzikgrupo Kajto. Informoj pri Kapriol' kaj ilia muziko troveblas ĉe http://www.kapriol.org/.

10-a Novjara Renkontiĝo

La 10-a Novjara Renkontiĝo (NR) kunigos supozeble ĉ. 150 ĝis 200 partoprenantojn el deko da landoj, simile kiel dum la antaŭaj jaroj. Ĝi ĉi-foje okazos en Bitburg, 30 kilometrojn norde de Trier/Treviro, proksime de Francio, Luksemburgio, Belgio kaj Nederlando. Multaj el la plenkreskaj partoprenantoj de NR estas el la meza generacio, kun aŭ sen infanoj; ĉeestas ĉ. 60 infanoj inter 0 kaj 14 jaroj, la duono el ili parolas Esperanton denaske. Bonvenas homoj el ĉiuj aĝogrupoj! Datoj: 27-a de decembro 2011 ĝis 3-a de januaro 2012, http://www.esperantoland.org/nr

3-a Novjara Internacia Semajno, por junuloj kaj junaj plenkreskuloj

Antaŭ du jaroj ni komencis aparte inviti junulojn kaj junajn plenkreskulojn por havi specialan programon, Novjara Internacia Semajno (NIS). Unuflanke la iamaj infanoj fariĝis junuloj kaj la programdeziroj ŝanĝiĝis (aŭ oni komune amuziĝas sen aparta programo...). Aliflanke NIS donu jarfinan renkontiĝlokon por junuloj kaj junaj plenkreskuloj ĉe la okcidenta limo de Germanio, proksime de Francio, Belgio k.a. Ĉi-jare la domo estas aparte taŭga kaj granda, tiel ke eblos doni apartajn koridorojn al tiu celgrupo. Ekzistas i.a. kinejo, kiu ebligos prezenti filmojn dum malfruaj vesperoj. http://www.esperantoland.org/nis

Venu festi kun ni la novan jaron!

Ĉion bonan

Lu Wunsch-Rolshoven

EsperantoLand http://www.esperantoland.org